問題天天都多，本周又多幾個，有啲有答案，有啲唔使答案。
英倫朝聖期間，有兩場波都見到一個奇怪現象，就係早走！烏普頓嗰場我見到下半場十五分鐘就已經有人起身，OK，係輸緊三球，但係波飛唔係平囉，嗰一刻，我真係好想落後嗰隊爭氣反底，等早走嘅朋友返到屋企時呻笨！
外國朋友睇波，入場遲，離場快，咁咩人最後離場呢？就係第一次到場嘅朋友，夢想成真，呢樣影吓嗰樣摸吓，真心like、呃like又好，賴死唔走直到被驅趕為止，通常呢班朋友仔都係遊客。第一次就咁不得了，咁如果係最後一次呢？
比利時有位布魯日嘅球迷Lorre（左），多年來受盡絕症之苦，喺無藥可救嘅慘況之下，佢許下最後兩個心願，一係見證愛隊又贏一場，二係容許佢接受安樂死。三月一日，當Lorre拖住阿女隻手行出球場，全場球迷都企起身報以熱烈掌聲，因為大家都知道，呢一程係佢最後一程。眼見Lorre一手拖住阿女，阿女又一手拖住吉祥物，Lorre一臉幸福笑容，加上行得又talk得，真係幾難相信佢嘅生命已經進入最後倒數。
問題又來了，咁佢嘅贏波願望，會唔會令到布魯日啲球員好大壓力呢？話晒都係堅踢嘅聯賽，對手雖然係下游分子，都唔會就住你踢㗎喎，咁萬一真係贏唔到，Lorre嘅計劃會唔會改變？定係不如睇多場先？結果諗多咗，下半場榜首嘅布魯日入三球順利贏波，完咗Lorre最後心願。Lorre睇完場波話：「我太開心嘞，阿女肯定畢生難忘呢一日。」老竇滿意地笑，但阿女就喊到收唔到聲。「我會喺天堂繼續慶祝！」佢喺球場留低咗咁嘅承諾。三月二號，Lorre含笑接受安樂死，告別人間。
如果得番一日命，咁你又會點呢？會唔會死都要去見你嘅心愛最後一面，去你最愛嘅地方坐吓，唔願走直到俾人趕？
KEYMAN
節目主持