打吡日對大摩特別有意義，事關佢本月17號就65歲牛一，舊年就憑「威爾頓」贏打吡預祝生日。今屆打吡大摩獨派「喜蓮歡星」上陣，要贏唔易，不過同日另一重頭戲女皇銀禧紀念盃，卻可以幫到大摩捧盃賀壽，事關佢隻千六王黑衣巨人「步步友」縮程跑千四米，數據上絕對有利。
睇番對上四屆此項賽事，分別有「締造美麗」、「雄心威龍」及「大運財」跑完1600米董事盃，縮程勝出女皇銀禧紀念盃，證明中距離馬始終級數較高，早前「大運財」縮程贏1200米主席短途獎亦係好例子，加上「步步友」貴為全球第二高分賽駒，睇怕大摩65歲前必做的一件事，就是要捧走女皇銀禧紀念盃。
除了「步步友」，大摩一對王牌馬「飛來猛」及「大家熊」均質新未盡唔可以睇小。「飛來猛」續配莫雷拉，適應過一場三班步速後，今仗可望重響勝鼓。至於「大家熊」連續兩仗1400米後追入位後向1600米進軍，有力打開勝門。