由昔日的性感女神變做今日的阿媽角色，女人四十的孫佳君開竅了，現身為兩子之母的她不介意扮演師奶，曾遭受前度虐打的孫佳君，人生經歷磨練了她的演技，從前的花瓶變了識做傷心痛哭的內心戲，曾經退隱影圈十年的她，復出後甚至願意唔化妝出鏡，孫佳君說：「我好鍾意做戲。」
撰文：余燕儀
孫佳君在電影《雛妓》扮演蔡卓妍（阿Sa）的母親，以前的性感女神變做平凡的師奶角色，她日前在尖沙嘴接受專訪說：「其實我覺得隨住年齡增長，當然角色都有轉變，以前我做阿媽肯定唔會似，𠵱家做阿媽就會似。都係時候要去做呢個角色，乜嘢角色都一樣，最緊要做得好，我真係冇特登諗自己要做性感女神，呢樣係人哋覺得，或者幾套電影出嚟效果，我最緊要求真實。」
演喊戲有壓力
唔介意做人阿媽？孫佳君爽快說：「我現實生活已經做咗人阿媽，點會介意，哈哈哈。我鍾意做戲，好鍾意電影，最緊要角色有得發揮，有時角色就係花瓶冇辦法，但呢個角色有發揮位，要求我唔化妝，覺得好真實，唔會有花瓶感覺，一個普通家庭主婦扮到咁靚好奇怪。」
孫佳君在戲中角色跟本身性格很不同，現實中她並不是傳統母親，孫佳君說：「呢個角色係乜都屈喺心嘅女人，我性格係如果有嘢會講出嚟。雖然戲份唔係好多，但差唔多每場都要喊，自己性格樂觀，要拍喊戲有壓力，我都有啲驚會演得唔好，太耐冇做，好驚現場喊唔出，幸好拍攝時都算順利，唔使好多take就收貨。」監製杜汶澤讚她有壓場感，可惜戲份少未能提名最佳女配角，孫佳君卻不失望：「我戲份唔多當客串，唔緊要，惟有等下一個角色。」
為劇本豁出去
曾經退出娛樂圈十年的孫佳君，跟富貴男友劉貴喬分手後，於三年前復出影壇，以為她是玩票性質，孫佳君堅定說：「唔係，我好鍾意拍戲，真係好熱愛電影，希望多啲機會，成日覺得自己未夠機會，我想拍好難忘、自己好鍾意嘅電影，扮醜都冇問題，如果劇本好，肥瘦靚醜都得，演員就係要咁。其實我唔係好重視人哋點睇，出街要好靚扮到隻雀，整齊當然要，但唔係keep住每秒上鏡都要靚。」
重出影壇的孫佳君覺得娛樂圈變化很大，她說：「最大唔同係𠵱家好多傳媒，跟蹤比以前犀利好多，做藝人同演員係兩樣嘢，藝人要學識接受俾狗仔跟蹤，反而演員開工做戲我就好鍾意。」
場地：La Locanda
情路傷痕纍纍
孫佳君的感情生活坎坷，十多年前錯愛羅兆輝，二○○九年涉被同居的富商男友劉貴喬打傷，兩人分手後她獨力照顧一對兒子，半年前再墮愛河戀上三粒星米芝蓮法籍大廚Olivier，回想上一段傷痕纍纍的感情，孫佳君說：「當係經歷，唔好生活喺過去，要放下，否則唔可以迎接更加好嘅嘢。」
孫佳君坦言跟現任男友很開心，身為大廚的他經常弄美食，又與她的兩個兒子相處得很好：「可能西方人熱情，鍾意小朋友鍾意玩，佢都好似一個大細路。」問有否想過結婚？她說：「一直唔鍾意結婚，以前唔相信婚姻，見到好多失敗例子，所以冇勇氣嘗試，而且我哋識咗五個幾個月咋，唔會諗啦。」