財困嘅帕爾馬又被扣分！意足總宣佈，因為帕爾馬出唔到舊年七、八同九月嘅糧，所以被扣兩分，加埋佢哋舊年十二月已經被扣一分，𠵱家帕爾馬只係得九分，距離尾二都差成十一分，幾乎降硬班。相比其他問題，其實降落乙組已經係小事，𠵱家帕爾馬仲未搵到金主，隨時有機會破產，被強制降落業餘聯賽，甚至散班。喺三月十九號，帕爾馬就會面對破產聆訊，到時就會知道呢支老牌球隊嘅命運。喺困境中，帕爾馬仲有班忠心嘅球迷支持。好似早前執達吏充公咗好多球會財物去拍賣，包括隊巴、健身及醫療器材等，而有一班球迷就用一千四百歐元（約一萬一千港元）投咗更衣室張長凳（圖）返嚟，之後再捐返畀帕爾馬，等班球員有凳坐。
識睇，一定係睇足英台【英波Live】：
http://soccer.appledaily.com
http://bit.ly/engballlive