今個禮拜最精采一場球賽，一定係歐聯車仔對巴黎聖日耳門，皆因場內場外是非、笑點太多，花生友更加空群而出。
首先伊巴謙莫域領爭議性紅牌，車迷已經準備叫徐小鳳，殊不知之後倒戈嘅大衛雷斯完美還拖，加埋時和波都可以送走車仔，一班「獌猁」及反「軌」大聯盟即時喺網上熱烈彈琴，對呢隊領先緊英超嘅大軍落井下石，摩連奴同迪亞高哥斯達首當其衝。此外，外國網民又玩埋改圖，寸車仔上唔到火車十六強止步；未完，伊巴之後亦不示弱開火寸車仔球員小學雞，但同時大衛雷斯（跪地者）又要為倒戈入球後表現太興奮解釋，摩連奴之後當然又好似成龍上身單打記者，總之賽前賽後場內場外都係火頭處處，乃抽水客與花生友最美好時光。故事又點會咁快完？今晚車仔對修咸頓，如果再出事……你懂的。
點解睇人嘈交咁興奮？其實爭論內容至係重點，講真你鍾意邊隊球隊，只屬於「價值問題」，唔會有數理邏輯上「對錯之分」，所以拗十世都未拗完（詳見《李天命的思考藝術》）。初級吵架者，多用粗言或人身攻擊，高手就會輕描淡寫一句窒爆秒殺你，當中大有智慧。再睇番近來本土新興運動：反水貨，場內場外網上一樣係戰場，大陸甚至有人出價請人來港鬧交（竟同足球流氓性質相似），開始有《九品芝麻官》吵架之勢。
梁栢堅
填詞人+彩池人