早前立民同Stephen有幸被邀請去英國睇波，立民作為咁多年利物浦球迷，都未去過晏菲路球場，今次有機會同咁多利迷一齊去，格外開心；Stephen未去過新溫布萊球場，英聯盃決賽就梗係要現場睇啦！比賽當日，立民睇到愛隊2:1贏曼城，向英超前四更進一步；Stephen就體驗到新溫布萊九萬人嘅震撼。
英國賭波文化深遠，由六十年代已經有場外投注站，每間球會都有自己嘅賭波公司贊助商，唔少球迷都會喺開波前買少少碰吓運氣。唔講唔知，根據上年《經濟學人》嘅報道，全球人均輸得最金嘅國家係澳洲，平均每人每年差不多輸九千蚊港幣。英國人反而唔係輸得咁勁，世界排名十一，人均輸三千左右，可能因為當地博彩市場開放，有競爭下公司將毛利降低嚟搶客。香港馬會嘅定位特別，又開賭、又做慈善，更係稅局嘅大客，相信短期內都唔會見到香港博彩市場開放。
去完英國，當然繼續推介英超。英超頭場水晶宮對昆士柏流浪推介入球「大」，主隊連續十場主場失波，應難阻狀態大勇的查理柯士甸（九號），但QPR近七場作客有六場最少失兩球，相信雙方今場入球唔會少。打入足總盃四強的維拉，將作客「和波專家」新特蘭，球隊在舒活上任後有所改善，近七次英超亦未曾不敵新特蘭，今場相信可以繼續搶分，受讓絕對超值。
STEPHEN、立民
有線球彩台智勝館主持