呢排港超多咗日援嚟搵食，雖然未必個個都咁好波，但態度同紀律就一流，近得啲日本兵多，亦多咗留意日本波，知道日乙嘅京都不死鳥（白衫）今季大搞，搵咗多名前國腳返嚟，當中就包括前南韓隊長金南一。踢乙組都咁重本，好明顯係要爭成績，上季入波停不了嘅大黑將志，亦可望續有「士哥」。
磐田山葉今季搵母公司山葉電機搭路，買入前英格蘭U21保夫萊特，呢啲大件頭前鋒一向都啱喺亞洲踢波，上場已經入咗兩粒，今場兩強對壘，吼入球「大」實冇錯。
星期日英超有曼聯對熱刺，戲碼夠吸引，主隊上場輸畀兵工廠，足總盃咁就收工。但最近睇落曼聯又非外間所講咁曳，陣式開始固定，朗尼都開始喺單箭頭位置發揮到應有水平，今仗冇迪馬利亞，但左有艾舒利楊格，右有路爾斯華倫西亞，曼聯可能踢得更順。熱刺今季換教練，踢得好好地後，突然又會失波。隊波咁多後生仔，水準唔穩就預咗，呢啲場合，點都要個「大」囉。
停咗近成年嘅教頭、球壇「學友」早排復出教流浪漢，早兩日喺旺角撞到佢講開佢隊波，佢搖晒頭話隊波以青訓為目標，一向甚受圈內外稱許，但自從學曦同門神傑轉埋「上山」，就好似後繼無人咁，留低嘅，操練同比賽都冇厘神氣，鬧又鬧過，罰又罰過，態度咁差唔知佢哋幾時醒覺，生性踢好啲波！
本地職業領隊
耳聽八方 專收好料