新城財經台在新春擺下一年一度「雄財宴」順便頒發「企業領袖品牌大獎」，三月九日在萬豪酒店宴會廳舉行。大量財經界人士捧場，宴會廳擠得水洩不通，凡此場合，左丁山例必早到早退，九時前離場，回家吃碗蝦子麵果腹，因為大型宴會大都起菜時間遲，頂多捱到飲完碗湯，已經夠鐘鬆人。
一入場就碰到地產代理高人馬主L，佢話自己隻馬已經因傷退役，唔似阿哥隻馬咁襟跑，係吖，馬主L哥哥隻「招財快駒」不時出賽，上星期日先至輸咗俾「鈦金剛」，無話可說。問地產L怕唔怕新金管局辣招，佢話對一手樓冇乜影響噃，一手樓好好賣呀，兩個新樓盤都去得好快，唔少買家有富爸爸富媽媽支持俾首期，降低一成按揭還是撐得住。
站在旁邊嘅富媽媽靚太T就不以為然，佢話：「我供書教學，希望仔女出嚟做嘢養番我，買番個七八百呎單位俾我住，等我賣咗自己間千幾呎，攞番啲現金炒股享福呀，有乜理由仲要繼續同佢地買樓？」講到供樓就有排勞氣，不說也罷，問靚太T：「你位公子在倫敦讀完書，做緊乜？」靚太T即刻笑到花枝招展：「我本來都間中鬧吓Cathay嘅，現在對CX好有信心，我個仔幾經辛苦先至考到入國泰嘅飛機師訓練計劃，現在澳洲接受訓練，五十五個星期，一個星期五天，六十幾次測驗，一路學，一路淘汰。原來咁鬼嚴格嘅，我依家對國泰機師好有信心。」左丁山潑佢冷水：「咁如果你位公子在第四十個星期肥佬出局，冇得留低，怎麼辦？」靚太T話：「汰弱留強，要接受嘅，如果真係咁，咪又搵過另外一份工囉，都係一個好經驗啫。」啱啱股票分析師H女士行過，佢聽到加把口：「喂，你仲記唔記得記者S呀，佢位千金又係喺國泰機師訓練計劃呀。記者S話個女有苦拼精神，頂住超嚴訓練要求喎。」哦，記者S係資深財經版編輯及記者，已經轉咗行，佢位千金又係咁醒，戥佢高興。行轉頭碰到專做舖位嘅代理W，問佢市道如何，佢嘅反應與地產L完全不同，幾乎想喊：「死得啦，成交冰封，租金睇跌呀，反貪腐之風到咗香港變成舖位吹冷風，又有細路仔暴力示威趕自由行遊客，簡直倒香港米，今年我諗零售與舖位租售都唔掂。仲聽到深圳嘅茶餐廳有香港客俾內地人毆打報復㖭，慘㗎！」