對手工藝老師傅來說，這是最好的時代，這是最壞的時代。
機械代勞，方便廉宜太誘人，手作被逼至牆角，無前景。可年輕一輩反而很尊重工藝而且好「渴」，君不見手作班遍地開花？雕刻144隻麻雀曾養活湄姐（何秀湄）一家，但現在麻雀舖營利有五千元已很不錯。捱下去，只為讓年輕人此這夕陽工業「得個知字」。同樣有雙巧手的日式紋身師Dust Wu（胡仔）拜訪湄姐，初試雕牌，「難」字滿天飛。雖然他的牡丹雕得麻麻，湄姐則謂首次嘗試，合格有餘了。
有新思維，傳統工藝回春不是夢！集合二人功力，一副新潮十三么出世。先由胡仔設計，萬子變慢子、索子有米、東南西北走簡潔路線圖像化。中發白保留原樣，皆因他認為線條夠靚。湄姐見設計圖。只見她左雕右鑽，然後吐出一句：「都幾刁鑽」，又繼續埋首，最後花了大半天時間完成。字體大小略有不均，線條不是死直，又！如！何！ 味道、心血從不以「完美」形容，工藝嘅嘢，機器識條鐵咩？
不過姜大衞把刀都有生銹嘅一日，更何況係人呢？他倆交流時，講到雞啄唔斷的，竟是長年勞動，雙手變「傷手」。湄姐常被雕刀刺傷，膠布長駐店內；胡仔長時間操作紋身機器，搞到手指變彎伸不直。這些苦，靠手藝為生的人，零舍有共鳴。
記者：葉青霞
攝影：林柏鈞、陳永威