英超榜尾三弱，升班馬暫時包辦，時日無多，再冇起色，齊上齊落；今周，睇中頭場輸到冇朋友嘅昆士柏流浪（QPR、圖），作客到另一倫敦球會水晶宮成大冷，博客W，再取入球「大」，料可起碼立不敗之地！
升上英超等如發大財。上季包尾嘅卡迪夫城，從電視轉播權分到六千二百萬鎊，仲未計往後四季落返英冠後攞到嘅「撫恤金」；去到二○一六至一七年起三季，單國內轉播權已漲價多七成至五十一億鎊，包尾球隊到時可分到成億鎊，冠軍一億五千萬鎊，你話長期留得喺英超幾爽。
升班馬喺英超首季保命率高近六成，近六季亦只有五隊即降；但今季佢哋「燒相書」，好難一齊留低等發大財，其中般尼同李斯特城，限米煮限飯，又冇炒領隊，有晒心理準備回降。昆士柏流浪就長期令外界失望，人腳唔差，尤其中前場；但致命傷喺後防，前朝老列納今季其中敗着就係搵里奧費迪南返嚟頂防線；又遺害後人，上仗主場受挫熱刺1:2，接任至季尾嘅領隊基斯藍斯，竟然用三十六歲嘅里奧去嘜今季英超新星、二十一歲哈利卡尼。唔係想講陰謀論，但基斯藍斯未去昆士柏前，喺熱刺擔任青訓阿頭達十年。
水晶宮半/一讓唔起
昆士柏已連續兩場主場，僅負阿仙奴同熱刺，落後下見有反撲餘力，尤其射手查理柯士甸喺呢隊波，超班貨色，力足起Q；今次轉作客鬥另一倫敦細會水晶宮，後者年頭換咗柏度領軍，打嘅都係下風波，擅長穩守快速突擊。查足智彩資料，水晶宮「讓球盤」今次去到讓半/一咁狠，屬今季首次，反而讓平/半試過四次，捧水兵上盤者全敗，球隊戰績兩和兩負，近年對賽未贏過昆軍。主隊今場續有隊長積甸拿克停賽，前線傷兵仍多，博有4.9倍W嘅昆士柏今場作客贏波，壓力唔大；另一注，則取有2倍嘅入球「大」，去到季尾，弱旅求和冇大作用。
另外兩場心水，過關波膽取阿仙奴迎韋斯咸，零失球贏波波膽，後者不復季初勇，賽前傷埋安拿華倫西亞，入波頗難；另一熱門，取近期英冠最勇嘅前列球隊屈福特，擊退有下周一英足盃重賽後顧嘅雷丁。
波神
神級攻略 智破足彩