禮拜日就係一年一度嘅香港打吡大賽，備戰馬匹除咗練跑，仲要游水練氣。八方直擊過馬會內設專門游泳池，原來馬仔識得用「狗仔式」游水，不過都游得幾慢吓，五十六米游泳池要游成分鐘，呼吸聲音仲好似打雷咁。練馬師容天鵬話九成馬匹唔驚水，但一匹馬體重過千磅，游水特別嘥力，每日只係游一至兩圈就可以鍛煉心肺功能，令四肢更強壯。
泳池衞生標準嚴格
用泳池比人類標準泳池深少少，全長五十六米，闊二點七米，深二點六米，有專人用繩牽引馬仔游水，馬仔露出頭部呼吸。泳池嘅衞生標準比人游嘅泳池更嚴格，任何地方所抽取一百毫升池水樣本，都唔可以有埃以氏大腸桿菌，池水更改用臭氧消毒，無刺鼻嘅氯氣味，保障馬仔皮膚同毛髮唔受刺激，泳池仲係恒溫廿四度㖭。
雖然聽落好吸引，但因為馬仔暢泳會隨時大小便，泳池都係靠過濾系統吸走穢物。容天鵬訓練嘅「醒目名駒」亦會出戰打吡大賽，噚日抽中第十檔，鵬哥話會有策略應對，「醒目名駒」比賽前都會如常游水減吓壓。