由美韋達（左）火併帕奎奧嘅世紀拳王之戰，五月二號會喺拉斯維加斯上演，佢哋周三就喺洛杉磯開咗個記招造勢。個人職業生涯四十七場拳賽贏晒嘅「不敗拳王」就梗係把握機會寸吓對手：「我成世人從來未試過咁想贏一場拳賽，我相信對方都係；不過，喺任何運動比賽，只要你輸過一次，就永遠會留喺記憶之中。」帕奎奧就謙虛得多，只係話會盡力打場比賽，希望觀眾睇得開心。