本身對特衰政府已經冇咩期望，近日仲聽啲令人洩氣嘅新聞，前保安局長無視示威者被打，反而大讚國內居民係香港米飯班主。坦白講，中國經濟下行已係不爭事實，連領導人自己都咁講；點知香港啲既得利益集團仲話到香港冇中國唔掂。睇番前宗主國，英國早前就公佈新優惠政策，年齡唔超過四十歲嘅首次置業英國人，可以享有稅務減免等優惠，變相以約八折買樓，小弟即刻想拎番本BNO出嚟，睇吓夠唔夠資格申請，亦都難怪近日遊行示威，點解有人拎番支港英殖民地時期嘅龍獅旗出嚟。
政府其中一個責任就係將資源分配；就好似英超咁，佢哋都唔鼓勵有某幾隊獨大情況，從佢哋嘅轉播費收益制度就睇到，二○一六年起英超又獲得一張轉播權「肥約」，一如以往金額分配都盡量平均，冠軍同包尾之間，相差只不過二千萬鎊左右，好讓下游球隊都有足夠資金擴軍；就算不幸降班，都有「撫恤金」等佢哋可以喺英冠東山再起。
轉會費高唔代表一定買到好嘢，仲有機會爭前四嘅修咸頓，杜辛泰迪治、加斯安奴柏利唔係好貴，不過就踢出身價；史雲斯仲靠韋菲特邦尼一買一賣，執過兩千萬鎊㖭。收得球迷咁貴月費，英超球隊點都要有球星嚟撐場。喺英足盃出局後，曼聯（中）就要認真爭前四，今周大戰熱刺；講買人，曼聯呢方面真係好識做，今季都未完結，已經傳出今夏無上限擴軍預算，保羅普巴、 尼達利基尼、羅拔利雲度夫斯基都傳出排住隊過檔，有買有賣再帶動成個轉會市場，曼聯簡直撐起英超轉會市場半邊天。
文：牽牛