新一季F1今個周末喺澳洲開戰（now672台今日9:25am起直播練習賽），新組成嘅法拉利孖寶維特爾同拉高倫，噚日就先鬥廚藝。佢哋噚日去咗跟名廚Guy Grossi學煮意粉，Guy試完味就判維特爾勝出，喺賽季正式開始前先攞個頭彩。
法拉利玩煮飯仔嘅同時，平治就去咗沙灘做宣傳。平治揸fit人禾夫爆料，同咸姆頓傾續約已經七七八八，只係差少少細節就傾掂數，而原本張約喺今季季尾結束嘅咸姆頓，都話希望盡快可以簽成份約，專心比賽。幾位車手晏晝就出席記者會，見到以十七歲之齡成為F1史上最後生車手嘅紅牛二隊新人韋特本（圖），九七年已經同麥拿侖簽第一張約嘅咸姆頓就話自己想唔認老都唔得。