喺立法會呢段休會期間，立法會主席曾鈺成去咗日本訪問，連日嚟嘅行程都好緊密，包括接受NHK電視台訪問，大談政改意見，包括預計今個夏季會再爆佔領運動，亦同居於東京嘅港人會面，了解吓佢哋喺日本生活嘅情況。
而喺噚日，曾經為人師表嘅曾鈺成，就參觀咗築波大學附屬高等學校，簡介香港嘅教育制度之餘，亦拍住秘書長陳維安，喺課室內嘅黑板前，笑笑口同着校服嘅日本學生妹以及老師等教職員合照（圖）。原來曾鈺成亦喺日本外國特派員協會嘅午宴，向駐日新聞工作者發表有關香港最新政制發展嘅演講，強調未來幾個月要表決嘅政改方案，係立法會最重要決定。