近日人民力量同熱血公民因為星期日屯門反水貨示威者，連細路女都嚇到喊一事，各自喺網上開火鬧對方，噚日人力陳偉業同熱血黃洋達終於喺港台節目當面對質，但兩人由頭鬧交鬧到尾，仲一度「講手」。
話說皇上係咁鬧人力同屯門反水貨劃清界線係可恥，大嚿反質問皇上係咪支持暴力？皇上之後仲出手拍大嚿膊頭一下，問咁樣掂吓係咪暴力？大嚿立即嚟料鬧皇上搞佢，仲話佢唔會掂皇上！
後來兩個講到一名十六歲少年當日被拉，大嚿話熱血冇幫手，係人力搵佔中義務律師救人，呢個時候皇上又大鬧大嚿講大話，但當主持畀時間皇上解釋，佢就淨係話跟進緊，連邊個律師跟進都冇交代，之後又立即鬧大嚿講大話，總之就以大聲壓場，完全係教主毓民風格。