唔同聯賽，就有唔同嘅轉播費分配模式。打個比喻，英超嘅分配方式幾有社會主義嘅特色，分得最多錢同最少錢嗰班差距唔大，貧富懸殊問題最輕，而西甲可以話係另一個極端，似係壟斷資本主義。
上季西甲嘅轉播收益有七億五千萬歐元左右，皇家馬德里同巴塞隆拿（左、右）各自收一億四千萬，淨係呢兩隊已經佔咗西甲成個餅嘅百分之三十七。收入第三多嘅華倫西亞只得四千八百萬歐元，比皇馬、巴塞差唔多少成億！至於艾爾切同華拉度列呢啲更只得一千八百萬歐元，收入只得兩大班霸嘅百分之十三。因此，啲西甲中小型球會成日出嚟嘈，唔滿意呢種資源分配嘅方法，但佢哋人微言輕，好似我哋呢啲小市民咁，就算明知制度唔公平，但都冇計！
點解呢個社會會有福利，財爺要派糖？因為小市民雖然影響力低，但人多勢眾，基層嘅不滿會引起社會動盪。有權有勢嗰班都意識都呢個問題，佢哋都唔想亂，所以就用福利安撫班窮人，透過資源分配嘅方法去維持社會穩定。
雖然皇馬、巴塞係最吸引球迷嘅兩支球隊，但佢哋都要有對手，先可以踢出漂亮嘅足球。之前有報道，西甲中小型球會計劃搞罷賽，爭取更公平嘅分配方法，除咗為啖氣，的確唔少西甲球會都係負債纍纍，仲成日聽到拖欠人工嘅新聞。為咗成個聯賽嘅穩定着想，皇馬、巴塞係咪要諗吓分啲甜頭出去呢？
文：咖喱