卡片，原來好容易令一個人現形。想當年，一張向入境處職員展示嘅卡片，令時為商務及經濟發展局副局長嘅蘇錦樑被指「大支嘢」，呢幾年放下身段，先令佢逐漸洗脫「卡片蘇」惡名。近日嘅京城，卻發生新一輪卡片風波，據知一位梁粉政協因為隨手丟咗記者嘅卡片，成為犯眾憎「卡片王」。
日光之下無新事，世界之大，卻無奇不有。噚日八方收到風，話北京雖然天氣寒冷，但採訪兩會嘅記者卻「㷫」烚烚，原來係俾一位梁粉政協激親。
係咪唔肯放料同扑咪，得罪晒啲記者？唔係噃，諸事之徒話佢聽聞，呢位政協不知幾咁好囉，近日主動邀約記者茶敍，講一啲佢想傳媒報道嘅內容。出席嘅記者，梗係禮貌地「派片」，據知對方傾談間亦笑意盈盈，不知幾咁nice，大家傾得好愉快㗎。
交完「水費」放垃圾桶
飲完茶，梗係放放水，話說呢位政協都唔例外，交完「水費」先至離開。點知轉個頭，呢個男廁內嘅垃圾桶內，卻有齊當時茶敍嘅記者卡片。邊個咁冇品、當記者係垃圾？雖然冇人追查，但一眾記者心中有數，大鬧呢位人前扮同記者傾得埋嘅梁粉政協，好不該。
查實政界中人丟記者卡片，未必係新奇事；但公然到呢頭見完、嗰頭就隨手喺記者活動範圍內丟，又確係比較新鮮。到底呢位世界仔係邊位？聞說佢最近發言時被發現，普通話水平太過普通。
李八方
mailto:[email protected]