去年六月港府拒絕向三名太陽花學運代表發出來港簽證，力阻佢哋出席華人民主書院嘅「台港社運交流」活動後，華人民主書院決定本周六轉移陣地，由校長陶君行帶同兩位書院董事何俊仁、鄭宇碩，周六啟程前往台北，同台灣社運人士作一連兩日交流。
據花生友了解，除咗上述三名書院代表，唔少本港社運名人都會隨團赴台，包括社民連主席長毛、民陣召集人陳倩瑩、社運人士朱凱迪，以及被七警毆打嘅公民黨黨員曾健超等，台灣代表則有聲援太陽花運動嘅台灣知名律師賴中強。
回顧大型社會運動
至於今次交流重點，據知係回顧去年台港兩場大型社會運動，希望從中吸取經驗，分為「回首來路」、「針砭得失」、「深化論述」同「展望前景」四個單元，相信台港兩地社運人士都會獲益不少。
除咗搞台港交流團，花生友聽聞，華人民主書院約三個月前已推出贊助券籌款，嚟緊仲會喺台港兩地，各搞一場籌款宴會，希望喺現時中共瘋狂打壓社運下，仍能籌到一年所需、約一百萬元嘅經費，令書院能夠繼續營運。
書院董事鄭宇碩就話，華人民主書院係香港社運界中，少有同台灣社運人士有連繫嘅組織，一直令阿爺十分反感，左報更不時撰文炮轟，雖然內地嘅民主，主要靠同胞自發維權，但由於抱住幫得幾多得幾多理念，書院都希望盡力而為。
花生友