NBA一哥勇士周三主場出戰活塞，靠射手K湯遜（Klay Thompson）貢獻廿七分，以105:98又贏一場，攞到今季第五十一場勝仗，平咗球隊上季全季常規賽嘅贏波場數紀錄。不過，爭緊西岸最後一個季後賽席位嘅雷霆，同日主場就以108:120輸咗畀快艇，俾塘鵝搶番個第八位。但同日雷霆宣佈咗個好消息，養傷多時嘅前鋒杜蘭特（Kevin Durant）會喺一至兩周內復出，全力爭上季後賽尾班車。
占士年薪有望加到三千萬
講開KD，除咗確定就快復出，佢周三都成為咗另一單球壇大新聞嘅主角之一。聯盟之前簽咗由2016/17球季起生效、九年總值二百四十億（美元，下同）嘅電視轉播合同，即係平均每季電視轉播收入超過廿六億，到時每隊嘅薪酬上限就有機會上到九千萬，比起下季預計嘅六千幾萬多一半！聯盟就提出「平穩度過薪酬上限上升」嘅方案，希望將大幅提高嘅收入平均分配畀所有球員，人人都有人工加，唔只得小部份球員受惠。但係一班賺開頂薪嘅球星又點會肯蝕底，所以球員工會已經拒絕咗聯盟嘅方案。
而KD同勒邦占士（LeBron James），就係二○一六年夏天兩位最大牌嘅自由身嘞。下季年薪同樣超過二千萬嘅佢哋，簽咗新嘅頂薪約之後年薪有可能升到三千萬！但身兼球員工會副主席嘅占士就懶神秘咁話：「我哋會喺夏天開會，一個好重大嘅會議，去討論大家想點處理件事；但𠵱家未係時候。」