人前甜美活潑的薛凱琪（Fiona），幾年前患上抑鬱，痊癒後奮力要做一個更好的自己。去年完成入行十周年演唱會，最近又被提名金像獎最佳女配角，參演新片《暴瘋語》飾演精神病治療師，正面回望患病的過去，展現招牌陽光笑容的她說： 「想用正能量影響到人!」
統籌：林妙萍 撰文：趙潔恆
攝影：郭賢興 造型：林嘉慈
化妝：Jessica Chan of Jessica Chan Makeup Workshop
髮型：Jo Lam of Queen's Private I
別看薛凱琪弱質纖纖，工作狂的她歌影兩邊走，工作日程排得滿滿，去年完成演唱會後，全身投入電影工作，現正四出宣傳新片《暴瘋語》。「我覺得拍戲好似放假，畀我喺唱歌工作以外，體驗唔同嘅嘢。」
黃曉明Nice
Fiona稱為「放假體驗」的《暴瘋語》，獲下月舉行的香港電影金像獎多項提名，卡士強勁，有影帝劉青雲、影后鮑起靜，還有黃曉明。Fiona在戲中與黃曉明有較多對手戲，面對內地男神她卻未有過電機會。她說：「雖然我哋飾演一對情侶，但比較sweet嘅場面喺戲入面可能得十幾秒咋！我拍呢套戲之前唔識佢，所以要喺咁短時間入面同佢打破隔膜同入戲，好彩佢係一個nice guy，未埋位會傾偈，最後我哋都做咗朋友。」
回看患病時
戲如人生，Fiona在新片中演精神病治療師，恰巧與現實中曾患抑鬱的她來個角色轉換，「我覺得呢個安排都幾得意，我成日都話如果畀我演個癲嘅角色，咁我就一定得心應手，但今次要我做治療師，就好似係做番當我病嘅時候，喺我身邊支持安慰我嘅人，我都回想番喺最嚴重嘅時候，我都曾經推開過想幫我嘅人，好似我喺戲中嘅經歷，明白到原來佢哋當時都好無助。」
回看患病過去，因得到信仰指引漸漸恢復元氣，是Fiona口中「活到老學到老」的重要一課，「除咗睇醫生，做治療、祈禱，去求神原諒我覺得hurt過我嘅人，仲要求神原諒我，令我明白到自殘、自殺呢啲行為係一個選擇，而其實我可以選擇快樂。如果有一日我覺得係時候喇，我希望出本書分享我呢段經歷。」
純男冇曖昧
有人話有愛情的滋潤，人就自然快樂，奈何Fiona還是單身，眼見同輩的官恩娜與吳雨霏先後結婚，又會否心急呢？Fiona斬釘截鐵：「絕對唔會，因為我覺得所有人都有各自嘅right timing，如果因為咁而觸動到我想去結婚， 其實都好危險。如果你真係要同人結婚， 就係一世嘅事，咁點解要咁急結婚呢？我會想同嗰個人認識做朋友，到拍拖一段長時間先會考慮結婚。」
愛情慢慢來，那幾個傳來傳去的緋聞男友堅稱只是好朋友，如何與異性保持純友誼關係？Fiona有一套原則杜絕友達以上的曖昧關係，「其實單純做朋友點解唔得呢？個決定權喺大家對手，真心唔想令件事複雜，就唔會超越界線，我好慶幸身邊都有好多單純嘅男仔朋友，keep住係好閨密。」
【投鮑姐奪女配角】
今屆香港電影金像獎的焦點放在影后之爭上，曾被提名最佳女主角的薛凱琪，今年憑電影《閨密》挑戰最佳女配角之位，不過她就對得獎與否抱平常心，「我從來都唔恨得獎，但係攞到我會好興奮。我知道獎得一個，但值得拎到嘅人有好多。如果我話對自己冇信心，鍾意你嘅fans會覺得點解㗎？」
Fiona續說：「我對自己喺《閨密》入面，演一個好大膽嘅女仔係有信心嘅，但我成日覺得投票畀自己好老套，所以我嘅最佳女配角一票投咗畀《暴瘋語》嘅鮑起靜。」
更多精采時尚內容，盡在 http://add.appledaily.com。