中文大學校友評議會每年都有一次籌款活動，籌款目標約為一百萬元，絕大部份來自校友捐款，捐款目的每年不同，記憶所及，過往為醫學院機械設備籌款的次數最多。今年主席陳志新要搞新意思，籌款不再為了購入醫療設備，而是為了研究香港城市交通。佔領運動期間，香港島中部與東部的交通異常擠塞，西隧過海則異常暢通，居民多用地鐵，軒尼詩道少咗大量巴士，陳志新在灣仔返工，見到呢種情況，突然想到，香港城市交通是否需要咁多巴士擠塞在道路上，催生環境污染。他偶然向左丁山提起，左丁山叫佢搵中大一個較新嘅未來城市研究中心商量吓，或可支持佢地做研究。
於是陳志新搵到梁怡教授，傾吓傾吓就達成協議，中大校友評議會2015年籌款目標為六十萬元以上，所得款項支持梁怡嘅研究隊伍做一個「低碳交通研究」，希望研究結果唔係空口講理論，而係對香港社會有實質貢獻。
梁怡係1972年崇基地理系校友，在美國科羅拉多大學取得博士學位後就返回中大任教地理系，屬中大資深教授；上星期三，陳志新請梁教授到新亞書院校友會午餐會講解研究目標及方法，引起熱烈討論，所謂低碳交通，是否就由電動汽車領風騷，為未來交通主力呢？梁教授話去完北京考察與考慮香港環境後，覺得又未必一定係，要因在於住屋、工商業運作方面，尚未有配套配合電動汽車日常運行，香港為電動車充電嘅地方更難搵，目前為一架電動車充電要好幾個鐘頭，美國不少家庭住在獨立屋，可在車房裝置充電器，晚上駕車回家就充電，第二朝返工就可以開車，一啲阻滯都冇，但香港邊度有咁嘅條件呀，而且電動車電池用鋰電，原材料係稀土，單係開採稀土已經破壞環境，殊不環保。講起嚟，梁教授話環保不能只講下游環保，要講埋源頭「環保」，全程環保，考慮嘅因素極多，我地不能揸住架電動車就笑哈哈，以為自己對環保有貢獻而不了解車底下嘅電池甚不環保，大量開採稀土會破壞自然環境嘅生態平衡。左丁山由是想起，潮流興講太陽能發電，但發電嘅solar panel係有毒物件（toxic），廢置後如何處理，亦是一個環保問題。講座聽完，覺得梁教授之研究，好有意思，請中大校友踴躍捐款支持，上中大網或向校友事務處查詢，便知捐款詳情。