港視（1137）主席王維基三年前將香港寬頻業務賣咗畀私募基金CVC，今日香港寬頻（1310）再次上市，雖然噚日暗盤價表現唔太爭氣，但相信都無阻一班早已投資香港寬頻嘅股東、尤其係八十七位香港寬頻持股管理人員（Co-owner）嘅興奮。
香港寬頻今日掛牌，如果呢八十七位仁兄一齊去港交所展覽廳敲鑼主持開市儀式，場面應該都十分壯觀，事關平時一隻新股掛牌，最多都係十幾位高層合照，成百人大合照真係好少見。
除咗八十七位Co-owner，華華都好想知道一手湊大香港寬頻嘅王維基會唔會現身同咁多位Co-owner分享喜悅，不過，聽聞王維基今日就唔會現身喇。
咁又係，港視近日收視都幾曳，若果佢一現身，到時大家又捉住佢問港視嘅最新情況，搶咗主人家風頭就唔好啦。