近排A股影視股大熱，隻隻升唔停，但要提醒大家，要炒內地影視股，一定要記得睇娛樂版！內地紅星王學兵前日被北京公安拉咗，罪名係吸毒，結果搞到銷售建築材料的上海中技控股，噚日無厘頭跌3.5%。事關公司去年八月進軍影業，頭炮就係王學兵所拍電影《一個勺子》，而家上畫無望，股價恐有排跌。
內地廣電總局曾出封殺令，要求所有有吸毒、嫖娼等行為的影星，所參與制作的影視作品全部禁播。呢招相當之辣，成為影視股最大風險。因為唔知旗下明星幾時會爆出醜聞。一旦出事，不單藝人錢途盡毀，所有攝製節目等於掟落咸水海，損失慘重。
最經典例子係去年浙富控股以4.2億元（人民幣．下同），收購內地《中國好聲音》製作公司20%股權。點知交易公佈後，憑該選秀節目上位的內地歌手李代沫，就因吸毒被北京警方帶走，自此消失樂壇。最慘係所有有李代沫出鏡的《中國好聲音》片段，不能再播出，浙富控股股價要插水30%，市值蒸發逾四十億元！
根據娛樂版八卦，王學兵有長期吸毒史，今次係被朋友舉報。對影視股股東來講，簡直係防不勝防，恐怕日後要以比讀財經版更認真態度，來刨讀娛樂版新聞。
李可強