北京兩會期間，權威人士消息滿天飛，有啲消息真係唔知信唔信好；但噚日全國人大常委范徐麗泰話下屆唔選人大嘅消息，就係佢親口講，百分百夠權威！范太以年紀大為由，表明係時候交棒，並且申明唔選人大同特首梁振英無關，唔知他日少咗呢位咁權威嘅鞭策人，梁振英若然連任，施政會唔會怠懶呢？
強調同梁振英無關
范太九八年起當選兩屆人大代表，○八年再上一層樓獲選常委，計埋呢屆任期，做到二○一七年底。佢噚日喺北京透露，做埋呢屆後唔競選連任，因為自己經七十歲，兩年後七十二歲，覺得應該交棒。唔選人大，換言之唔再有機會獲選常委。
政圈唔少人私下講，唔通范太近期有啲乜得罪咗阿爺，被迫棄選唔再做舉手機器？又會唔會係佢喺梁振英當選特首後，太過積極「鞭策」CY而未獲阿爺歡心，黯然求退？有記者噚日問范太，今次棄選同CY有冇關？佢強調退下來嘅決定同現任特首無關喎。
傳譚惠珠接棒常委
唔知CY知道范太棄選人大、冇咗常委呢個江湖地位，係咪如釋重負？只知道政界曾流傳，阿爺之前屬意過由譚惠珠接棒做人大常委，但八方發現，珠姐到咗二○一七年都七十二歲，如果佢可以接任，即係范太嘅年齡問題不是問題啦，所以有人都唔信真命天子係珠姐。
李八方
mailto:[email protected]