國泰航空（293）前公關一姐莊偉茵（Quince）果然走得有道理，佢二○一二年九月過檔中電（002），翌年底升做企業發展總裁。根據中電最新年報，佢舊年年薪八百八十萬元，較佢離開國泰前多八成。
由於Quince前年年底升職成為高級管理人員，所以佢嘅年薪喺中電最新二○一四年嘅年報先至顯示出來。
翻閱佢舊東家國泰嘅年報，Quince二○一二年八個月出糧三百二十萬，按比例估算，佢全年可能有四百八十萬，照咁計，佢過檔中電之後嘅人工接近倍增。
佢舊年袋八百八十萬入面，底薪與花紅各佔一半，相比中電另一位阿姐，即係中電副主席阮蘇少湄仲要多些少，阮太舊年年薪八百五十萬。而佢哋一班高層管理人員中，最高薪係常務董事麥禮志，袋近三千萬元。