堂堂周薪廿幾萬鎊嘅世界級前鋒，竟然淪落到要踢預備組，陰公豬。加盟曼聯半年，到𠵱家都只係入得四球嘅法卡奧，喺周二被安排踢曼聯U21賽事。
表現差勢被踢走
其實間唔中都會有一隊球員會去踢呢啲預備組賽事，不過多數係畀一啲啱啱傷癒嘅球員落場操起狀態，法卡奧冇傷冇病，喺周一英足總坐足全場冷板凳，咁就唔知教練雲高爾係乜嘢意思咯。今場波除咗法卡奧之外，仲有域陀華迪斯、占士威爾遜同拉菲爾達施華披甲；有得踢總好過冇得踢，既然落得場，點都要搏吓啦！點知法卡奧都係入唔到波，到七十分鐘被調離場。曼聯喺今季後會唔會畀成四千幾萬鎊去買斷法卡奧，相信大家都心裏有數；至於另一位今季喺曼聯冇乜運行嘅拉菲爾達施華，就喺今場踢爭氣波，入波幫曼聯以1:1逼和熱刺U21。
識睇，一定係睇足英台【英波Live】：
http://soccer.appledaily.com
http://bit.ly/engballlive