韋達在港策騎近廿年，從未試過連輸五期，佢曾經試過三次四連敗，跟住嗰次賽事，都順利重響勝鼓。呢晚佢於谷草歷史重演，第五場四班1200米，接手東廐「萬事盛」沿途前置守靚位。直路加速力雖然唔算特別強，但都能夠力壓一路放頭、告達理旗下的「好友星威」，勝出個人近五戰首場頭馬，告東尼同大佬順利包辦217.5元兄弟Q。
伍燕梅的「萬事」系馬同韋達有緣有份，之前一對「萬事旺」同「萬事勝」初次配韋達冇W有P，今勻「萬事盛」一用呢個配搭，馬上打開今季勝門，13屆冠軍交足功課，而第四口孖寶亦都由「大寶藏」同「萬事盛」呢對灰馬囊括。
告達理今季每逢贏馬，他的準新抱Paris陳穎多數出現拉頭馬；今場其弟告東尼唔執輸，兒子崇恩的女友、拿督女莊思敏的妹妹莊思華，亦大晒長腿，陪住準奶奶寶蓮拉頭馬，一齊戥伍燕梅高興。
第五場季軍是雷神揀騎排12檔的「大勇士」，能後上第三全靠雷神功力，第四名是綠燈W、啡燈P李寶利之「特務飛龍」身上，這晚李寶利告別戰，跑完上半場僅得一季一殿，反為大熱門「淳綵」拉士騎落一滴都冇，令人失望。