日本藝術家奈良美智筆下嘅小女孩再次來港，今次個人展覽以「星星」為主題，將自己生活經驗同感受投射喺小女孩身上。對小朋友嚟講星星唔只係天上遙不可及嘅亮點，更加係對未來嘅期盼。奈良美智話自己喺農村長大，見過滿佈星星嘅夜空，畫畫時自然融入其中，但佢賣關子唔透露每幅畫背後故事，等大家有唔同想像。另外，部份作品用粗麻布拼貼喺木板上，然後直接作畫，令作品呈現木紋同層次，類似街頭繪畫，甚至係小朋友塗鴉嘅效果。佢仲自嘲年紀大，情緒起伏冇咁大，連帶小女孩眼神都變得柔和。作品聽日起喺中環娛樂行十五樓嘅佩斯香港畫廊展出，免費入場。