靠頭槌梅開二度，做埋歐洲賽史上第一射手（見附表）！但基斯坦奴朗拿度（C朗）喺周二歐聯十六強次回合都黑晒面，發老脾封嘴。鬼叫皇馬後防紙板咁咩，C朗入幾多，後面就輸更多，結果主場以3:4不敵史浩克04。好在首回合贏得夠多，皇馬總比數贏5:4，驚險晉級八強。
亨特拉爾倒戈搶鏡
史浩克二十分鐘就由基斯甸富治斯開紀錄。皇馬表現好差，加里夫巴利全場隱形，卻奧斯同基迪拉控制唔住中場；好彩C朗超有鬥心，五分鐘後接應角球頂入追平。C朗追一球，後面就失一球；四十分鐘，亨特拉爾倒戈入波，史浩克再次領先。完半場前，又係靠C朗頭槌入多球，皇馬先可以半場唔使輸。C朗入完波後黑晒面，好鬼肉緊！
換邊後，賓施馬幫皇馬射成3:2，但條後防仍然好似紙紮咁，又輸多兩球，終以3:4敗陣。臨尾門將卡斯拿斯撲咗幾球靚波，皇馬先保得住個出線資格，兩回合險勝5:4入八強。皇馬球迷向來都要求高，呢場當然睇到好鬼嬲，係咁「開汽水」柴台，其中巴利幾乎掂親波都俾人噓。另外，呢場入球騷真係搞到一地眼鏡碎，開出12.5倍嘅客W，同埋二百五十倍嘅「客其他」波膽。
壓魯爾成歐洲賽入球王
C朗累積七十八個歐洲賽入球，超越魯爾，成為歐洲賽入球王，但睇見球隊輸波出線，C朗心情極差，完場後打算即刻返更衣室，俾隊長卡斯拿斯喝住，先至勉強多謝球迷。出返嚟後，C朗仲係黑面，路經採訪區冇留步答問題，仲話：「今季完之前，我唔會講任何嘢！」我求大俠覺得C朗應該係輸波心情唔好先咁講，相信等佢下咗啖氣後，都會同記者講嘢嘅。至於教練安察洛堤賽後就認低威，話抵俾人噓。另一場十六強次回合，葡超嘅波圖主場輕取巴素利4:0，兩回合贏5:1晉級。
識睇，一定係睇足英台【英波Live】：
http://soccer.appledaily.com
http://bit.ly/engballlive