胡森同孫達志都係歐洲練馬師，近年做咗難兄難弟，幾乎季季煲魚生粥僅贏夠數畢業。今季繼續同病相憐，呢晚谷草跑落以胡森醒神好多，頭場12號馬「精彩時機」由田泰安跑第四，到了第二場四班1000米，同冧巴馬「高山威龍」夥拍蘇狄雄後上殺晒，六歲馬爆24倍冷win，獲得今季第二捷，馬主同騎練一齊敲響羊年勝鼓，黑氣全消，不過胡森暫時只得七場頭馬，仍欠八場才達標，形勢依然險峻！
今場「悅欣賞」閘前倒水，由20幾倍打到8.5倍開跑着啡燈，結果外檔起步搶放騎足全程僅得第三，另一落飛馬「陽明揚揚」後上將「悅欣賞」追過得亞軍，與「高山威龍」串成113倍綠燈Ｑ，第四名至係大熱門初跑谷草之「及時取勝」。
「高山威龍」馬主朱嘉樂指賽前對愛駒的信心只是一般，只投注了少許而已，估不到馬兒可帶來驚喜，要一讚胡森出色的部署，負輕磅亦有助偷襲。
至於「悅欣賞」馬主曾向欣一頭長長秀髮入場，她指馬兒排八檔形勢不利，能保住一席季軍已算不俗，希望下仗好運一點排得内檔，有助發揮。