《蘋果日報》副社長林平衡噚日last day，社長堅哥同聯席副社長張劍虹、新老總陳沛敏，帶領一眾員工搞咗個歡送會，賀林副社榮休。
行家之間一向叫林副社做「堅林」，所以噚日大家就送咗個「我要真堅林」蛋糕畀佢，而林副社平日最like嘅，就係得閒喺佢新界屋企外面塊地種下瓜瓜菜菜，所以一眾同事送咗張簽名大型賀卡畀佢，印住「鋤報不如鋤地」。林副社退休之後，唔使再返堆填區日捱夜捱，可以歸園田居，八方都戥佢高興。
林副社喺《蘋果》做咗十七年，絕對係老臣子，今次榮休，一眾同事梗係叫佢講番兩句嘢。佢開頭都話唔講，之後徇眾要求講兩句，話唔好睇堅哥好似好惡咁，其實內心係好善良，一眾同事亦唔放過集郵機會，紛紛排隊同林副社合照留念。臨別贈言，現年六十一歲嘅堅林話，近年新聞媒體喺網上世界發展迅速、前景廣闊，寄語《蘋果》同事繼續努力，做好報章同網絡平台融合。