劍橋大學國際考試委員會最近公佈劍橋IGCSE（國際普通中學教育文憑）考試得獎名單，英基有十個學生分別喺戲劇、世界文學、中文、附加數學、綜合科學（雙獎）考到全球最高分，個個都話好驚喜，冇諗過成績咁好。
其中有一副南亞臉孔嘅Shimali De Silva以戲劇考到全球最高分，佢話自己其實更鍾意英文同文學，將來讀大學都會循此方向。
怕難融入香港嘅大學
今年十六歲嘅Shimali生於澳洲，五歲嚟港定居，父母係斯里蘭卡人，話每當被問到係咩人都有少少尷尬，雖然好鍾意香港，但可惜冇學識廣東話。佢仲話好鍾意去茶餐廳，最鍾意食奶油多同牛腩。
以綜合科學（雙獎）考到全球最高分嘅甘子穎就話，最想去英國讀書，唔多想留喺香港，擔心如果喺香港讀大學，個個同學都講中文，怕難融入。佢亦覺得香港嘅環境唔太鼓勵科研，認為喺外國會有更好發展。