荷李活男星尊尼狄普（Johnny Depp）近排越嚟越神化，繼上年十一月喺荷李活電影頒獎禮中，醉住上台撞咪後，今年一月就喺日本記招玩甩底。早排新婚嘅尊尼原本喺澳洲拍緊《魔盜王》第五集《Pirates of the Caribbean：Dead Men Tell No Tale》，但無啦啦整親手，要停工兩星期。
據澳洲報章指，尊尼係喺黃金海岸整親，而唔係喺拍攝現場，但就冇公佈佢點樣整傷。尊尼傷勢似乎唔輕，佢要立刻返去美國做手術。昨日有傳媒影到佢喺布里斯班機場上私人飛機嘅情況，尊尼隻右手包到紮糭，據指佢要返美兩個星期，劇組發言人話對拍攝進度唔會太大影響，因為套戲後年先上。由於尊尼喺度假勝地整親，再有網民估計佢可能又係飲醉出事，早排話想戒酒嘅佢，仲唔快啲戒恐怕遲早又會再出事。
至於另一神化男星沙拉保夫（Shia LaBeouf），最近因為佢女友Mia Goth戴住隻大鑽戒，即傳佢哋訂咗婚。
撰文：李村姑