沈集成馬房近兩戰均有馬贏，剛戰更憑「彩球」、「曦世之寶」起孖，今期(11日)沈廐仍火力十足，其中第八場96歲馬主曹光彪的愛駒「威龍」，上星期三晚由楊明綸後上建功，一個禮拜後咁心急又跑，擺明打鐵趁熱要乘勝追擊。
除咗「威龍」，有隻馬跑得仲密，就係尾場方嘉柏嘅「十二門徒」，剛周日先爆13倍win，三日後今期又上陣，好似搶錢咁！咁究竟呢類新勝匆出馬，買唔買得過呢？
唔睇猶自可，一查番數據，真係畀佢嚇親，原來今季共有九駒勝後，相隔一周或以內匆出，結果取得四冠三亞兩季全上名，入Ｑ率高達七成八，買位置更百分百收錢，呢條攤路係咪好驚人先？
「威龍」來港前有三連勝紀錄，同父馬「勝算高」上季亦三連勝，證明呢系馬好開就好，今次「威龍」升班負磅大減，再下一城真係唔奇。而「十二門徒」季內已四捷，擺明大熟大勇進步良多，方廐今季曾有「勁綵」勝後三日再出再贏先例可援，足以證明「十二門徒」匆出唔係講玩！