生於憂患，有種責任，原來花都一樣。近來有冇發覺啲花開得好燦爛？包括櫻花、芒草、風鈴木等，好多人影咗都Po上facebook。不過，大家一窩蜂高興賞花之餘，最近都有一種說法，話鮮花盛放，其實係天氣變差嘅警號！
＃感受到乾旱危機
台灣、日本多種花都盛放，如台灣中南部嘅風鈴木「大爆花」，夾道大片鮮黃色嘅「黃金花海」，台灣fb都洗晒版，但當地屏東科技大學森林系主任羅凱安話，植物對天氣好敏感，舊年底至今天氣比較乾、氣溫變化大，風鈴木可能感受到乾旱危機，所以努力開花，係「生於憂患的表現」，趁天氣好盡力開花播種繁殖下一代。當地又有學者話，好多花都有呢種適應環境能力，甚至會預計到天氣將變差，會好天斬埋落雨柴，趁好天盛放。
香港蘭藝會會長朱劍虹話，植物係有呢種絕處逢生嘅天性，對天氣好敏感，少少變化已可大約預計到未來天氣，例如鐵樹感受到可能乾旱、空氣差，就會趁好天氣努力生長，甚至會少有地開花，「所以舊時嘅人見到鐵樹開花就話唔好預兆，其實以前嘅人務農，天氣差梗係唔好啦」。
不過，佢話呢套理論比較適用喺少開花嘅植物，如果係每年都定時開花嘅，就未必適用。佢認為只因呢排天氣較暖，所以花開得燦爛啲，好似佢哋三月十三日至十六日喺沙田大會堂搞嘅蘭花展，「今屆啲花開得特別靚呀」。
費清
＃要生計，也要生活 ＃毋忘初衷