做人唔叻唔緊要，最緊要將勤補拙。一眾問責局長中，民望淨值最低嘅教育局局長吳克儉，噚日紮住隻右手出席一間小學嘅活動，八方近睇後發現，吳得掂隻右手腫到元蹄咁款。
吳得掂話佢隻手啲筋腱出咗事，有啲類似網球手嘅問題，咁啱前日先做完手術。其實政府宣傳片都有教：有病就唔好返工喇，吳得掂仲話醫生畀咗兩個星期病假佢㗎，但自己實在太忙嘞，所以都係唔放，照返工算數。
做問責局長冇勤工獎㗎喎，唔通吳得掂見民望低，用勤力博市民like？噚日佢喺活動致辭時除咗講教育議題，仲提醒學生老師們流感肆虐要注意衞生，連食衞局局長高永文嗰瓣都撈埋！