香港多名前任同現任高官許仕仁、曾蔭權、湯顯明、梁振英輪住捲入涉貪案，嚴重打擊香港廉潔形象，香港喺多個國際廉潔評級排名同廉潔指數都下滑。廉政專員白韞六噚日同傳媒茶敍時透露，廉署五月舉行嘅國際會議，除一如以往邀請各地反貪執法機構代表講吓打擊貪污最新策略，今屆仲請咗透明國際世界正義工程、世界經濟論壇同世界銀行廉政局等國際廉潔評級機構嘅負責人參與會議。白Sir直言，「希望呢啲評級機構代表親身體察香港廉潔並冇轉差嘅真實情況，唔係單憑觀感去判斷」。
提及廉署外訪同應酬支出係咪比幾年前減少？白Sir爽快答：「應該係！」原來白Sir去年只係拜訪內地兩次，比起湯顯明平均一年去七次少好多。而捲入貪湯案嘅廉署社區關係處處長穆斐文本月尾退休，八方問佢會唔會同老公劉江華去旅行輕鬆吓，佢話：「我好少同老公去旅行。」