香港劍擊隊一向佔據亞洲前列，今次就輪到一班後起之秀發威。一連八日嘅亞青賽前日喺阿布扎比落幕，有仁川亞運代表張家朗坐鎮嘅港隊，壓軸一日再添兩銀一銅，一共「刺」走一金四銀八銅，當中金牌美少女張曉晴亦會喺今日隨隊凱旋。
亞青賽上個月廿八日開打，港隊兵分兩路出戰少年同青年組賽事，前日終於上演壓軸嘅青年組團體賽。仁川亞運男子花劍銅牌得主張家朗，個人賽拎完銀牌後，再喺團體賽夥拍袁晉禧、吳諾弘同埋鄧沛霖再添一銀。而何思朗、曾子軒、陳廣橋同埋陳卓謙，亦喺男團佩劍奪銀，加上港隊喺男團重劍再摘銅牌，九日以來共擸走一金四銀八銅，以十三塊獎牌完美告別今屆賽事，大隊今日晏晝就會凱旋返港，備戰月底嘅世青賽。
其實唔只男仔有好成績，女隊喺今屆賽事都有驚喜，最矚目嘅當然係港青「小花」張曉晴。佢喺上個禮拜嘅女子重劍個人賽，擊敗中華台北對手神勇奪金，之後仲喺團體賽摘銀，成港隊大贏家。呢位小女孩開賽前一日先夠十五歲，就讀九龍塘名校瑪利諾修院學校，仲已經係U17香港一姐，衝出亞洲指日可待啦！