早幾日全世界為一條裙係乜嘢色議論紛紛，唔少人因為同家人或情人睇到唔同色大受打擊。原來同一樣嘢，每個人真係可以有唔同「睇法」！有專家話關對眼事，又有人話係個腦嘅問題，眾說紛紜。嚟自美利堅大學（American University）嘅教授Arthur Shapiro就話關個腦事，每個人睇嘢個腦有唔同處理方式；就算係同一個人，唔同年紀、受周圍唔同因素影響都會睇到唔同影像。
擅長設計錯覺影像嘅Shapiro近日受港大心理學系邀請，嚟港講吓錯覺係乜。佢話人腦對顏色嘅詮釋好受環境同對比度影響，程度因人而異。譬如同樣嘅綠色色塊，放喺深綠色背景中會睇會淡色啲，放喺淺綠色背景中就深色啲。佢今晚七點有場公開講座，主題就係「錯覺中的科學與藝術」，免費入場，地點係港大百周年校園CDP-LG18。