自由黨榮譽主席田北俊雖然對狼冇乜興趣，卻係一個愛犬之人，閒時都鍾意拖住狗狗去行山，之前就同愛犬MiMi出席該黨山頂區區議員陳浩濂搞嘅活動，一齊喺盧吉道行山抗議發展酒店項目！
查實田少唔只一隻愛犬，仲有隻養咗好多年、已經十六歲嘅Milo。但田少噚日喺facebook透露，身在北海道滑雪嘅佢，收到田太短訊，話佢哋好愛錫嘅Milo噚日朝早過咗身，可惜自己身在日本，見唔到Milo最後一面。唔少市民留言安慰田少唔好太傷心，相信Milo會去到「彩虹橋」，連張寶華都留言希望Milo R.I.P。田少則留言"Thanks, everyone."