近期政圈最紅嘅人，要數放風話如果政改方案被否決，特首梁振英極有可能連任兼會重推《基本法》廿三條嗰位「接近中央權威消息人士」。查實呢位立法會主席曾鈺成口中「仁兄」嘅稱銜，喺唔同電子傳媒同報紙都唔同，因為唔開得名，大家對佢嘅稱號自然各自演繹。花生友唔係曾主席，夠班質疑呢位仁兄夠唔夠權威，只知風一放，「權威人士」就萬箭穿心變咗箭豬咁滯！
又講真吖，唔少政界中人連日剝住花生講呢件事時，不約而同話係舊聞，一早聽聞二○一七年普選特首方案若然過唔到關、梁振英連任機會大啦，但可能因為啱啱人大委員長張德江高調力挺梁振英平息佔領運動有功，反映梁振英獲中央睇重，加上時值兩會嘅敏感期間，「權威人士」只係闡述咗一啲分析，就突然好似被睇成中央放風咁啦。
有隔岸剝花生嘅香港政壇中人豎手指大讚呢位「權威人士」，讚佢夠勇敢，代唔少非梁粉建制中人講出心底話。之不過呢，勇敢係要代價㗎，據聞自從相關消息一出，無論係中央政府以至中聯辦都大為震怒，覺得呢位「權威人士」係咪別有用心搞亂檔？抑或真係因為私人恩怨而搵梁振英祭旗？唔少冷箭近日插向呢位「權威人士」，令佢萬箭穿心受盡指摘。
花生友唔知，如果中央捉到呢位放風「權威人士」，會唔會向佢問責？只知道呢個論調一出，確實喺坊間引起討論，普通市民開始諗：到底梁振英定袋住先更難啃？有口痕友笑稱，「權威人士」呢鋪犧牲小我、完成大我，就算匿名都值得名留港史。
花生友