財政司司長曾俊華不知何故，在預算案提及Foodtruck，香港譯名譯得幾好聽，就是「美食車」，電台訪問曾先生，佢話回憶在美國讀書時，校園外就有「美食車」，令佢想起香港可否有同樣平民食物設施。
財爺在麻省理工讀建築，後到哈佛大學讀公共行政碩士，因而識咗班上一位曾蔭權先生，跟佢返嚟香港，今日成為大官。哈佛校門外之哈佛廣場不時有美食車，肥仔K與學生豪在哈佛上暑期班時都幫襯過，財爺在波士頓多年，當然見過好多次，何解咁多年來都冇引入香港之意圖，今年就突然想起？
恐怕係「民粹主義」之過，追求所謂民望也。民間有聲音搞飲食夜市，仿效台灣、仿效曼谷，於是香港政治人物又突然間話要關注夜市，如桂林街夜市之類。呢啲係屬於「感性管治」，並無嚴格分析之理性內涵，長遠嚟講，係將香港拖後腿，拖回到小農社會；台灣嘅城市普遍落後過香港，香港要走入世界尖端城市之林，做乜要行返舊路！
有人打電話到電台烽煙節目講及懷念幾十年前嘅街頭「美食」，「夜市」，主張香港復古，當作增加旅遊景點云云。懷舊也要知道懷舊嘅歷史背景，1950-1960年代，香港人普遍貧窮，住在山邊木屋、板間房、鄉村寮屋者眾，因收入低，自然要吃價格低廉食物，而且當時人口少，只有二百幾三百萬人，山東街豉油街西洋菜街一帶曾經舉辦過農曆年年宵市場，係今日完全不可想像之事，而左丁山住在洗衣街，可以晚上在馬路踢波，故此當時街上有小販，有夜市並不太嘈吵、騷擾民居。
今日香港何來如此環境？人口增加到超過七百萬以上，香港市區住宅總面積仍然同1970年差不多，只係增加咗填海面積啫（例如西九一帶）。1970年代中期，港英政府已逐漸淘汰有牌小販，奶路臣街西洋菜街之大牌檔「完成歷史任務」，陸續收檔，政策目的好清楚，就係要建立街頭秩序，搞好街頭環境衞生及適應公共交通需要。好幾年前，食環署驅趕戲院里擦鞋仔，就係此項政策嘅持續。失驚無神，食衞局未經各方諮詢之下，放風話可以考慮小販夜市？此議相信會失敗收場，十八區區議會必定為此吵鬧不堪。在Nimbyism盛行之際，夜市最好設在第二區，我區要保持衞生安寧，減少排放！區議員唔出聲呀，休想連選連任！