經常俾本土同城邦派嘲諷為「大中華膠」嘅民主黨何俊仁，竟然有幸獲邀同國師陳雲同枱食飯？原來鐵頭仁有個台灣朋友最近來港，咁啱呢位朋友以前喺德國留學時識咗陳雲，所以一次過叫晒兩位香港朋友同枱擦番餐。八方問鐵頭仁，席間有冇就本土問題同大中華膠問題同國師爭拗先？鐵頭仁笑笑口話，雖然陳雲嘅主張好激進，但為人好斯文，大家席間各自表述，氣氛不知幾咁和諧。
原來呢次都係鐵頭仁首次同陳雲食飯，同枱仲有國師創立嘅香港復興會一位秘書長。國師仲向鐵頭仁送上「厚禮」，就係香港復興會嘅小冊子，鐵頭仁話雖則好了解國師嘅主張，但都會細心研讀小冊子內容。