迪斯高（圖），貴為波斯尼亞國腳，贏過德甲、英超冠軍，很風光吧？但不知有多少球迷留意到他近年的遭遇：前季他曾「榮膺」英超後備入球王，這個聽落威風的名銜，其實是個矛盾的諷刺：「我咁搏命、入咁多波，點解仲要做後備？」到今季因傷患影響上陣次數，終於對紐卡素入球靚波，諗住信心返晒嚟；點知下場對利物浦，明明又有波入，只係下半場失咗一、兩個機會，立即被換走；因為球隊又買了新人韋菲特邦尼。再下場對李斯特城，迪生又已掉回後備席，據聞曼城已想同阿仙奴搶文迪蘇傑代替佢。
其實好多人都好似迪斯高，不是冇實力、也非不努力，卻因際遇、運氣；唔夠滑頭？唔肯擦鞋？總之，老闆係睇佢無咁順眼。明明日日都準時返工，努力工作，但偶爾一次犯錯，立即被老闆無限放大，分分鐘人頭落地；而總會有些擦鞋仔（所謂「心腹」），遲到蛇王、錯漏百出，老闆都側側膊，唔多覺，年尾仲分花紅加人工。
如果你都係「迪斯高」，除咗自怨自艾發脾氣，或者到鵝頸橋打小人，仲可以點？我就會學真嗰個迪斯高，繼續搏命練波，減少犯錯，一有機會落場就做好自己。你未必聽日就做到老闆；但可以「長命」過佢，等有朝一日另一位賞識你嘅老闆上位，就係發圍時候。希望迪斯高今季可長入長有！
方栢翹
now足球評述員