自拍呢樣嘢，原來係會上癮㗎！八方早前都寫過，全國政協常委唐英年北上開兩會期間，忙裏偷閒遊京城時不忘selfie一番。
兩會會期過咗一半，唐唐仍然乖乖留守京城開會，但佢都不時喺微博同粉絲講吓近況，噚日佢留言話風和日麗、天朗氣清，好想出外曬吓太陽，欣賞北京景色，可惜吖，會議議程好緊張、行唔開。而佢自得其樂嘅方法，就係喺人民大會堂門前同開會嘅座位影相留念，顯然selfie絕對唔係港女嘅專利。
雖然天氣好咋，但唐唐心情或者麻麻，因為佢對泛民同京官未能見面覺得可惜，但仍然相信柳暗花明，政改問題仍然有轉機喎。