打工妹成為女首富！湖南農村出身的周群飛，於一九七○年出世，上世紀九十年代來到深圳，由打工妹做起，佢創辦的藍思科技昨日開始在A股創業板招股，市場普遍預計市值將達六百億元（人民幣．下同）。周群飛持有公司90%股份，身家將達近五百億元，超過碧桂園（2007）太子女楊惠妍的四百四十億元，一躍成為中國新女首富。
呢間藍思科技非常巴閉，係蘋果、三星手機和平板電腦玻璃主要供應商，佔去年全球市場20%，與其最強勁的競爭對手，深圳伯恩光學叮噹馬頭。周群飛背景對外界而言，有非常多謎團。佢只是普通農家女，點解可以將一間高科技公司經營得咁成功，搶到蘋果定單？內地手機代工業係台灣佬天下，佢如何突圍而出？
新華網曾報道，周群飛曾在伯恩老闆的楊氏家族企業任職多年，後離開創立藍思科技，而家有香港身份證。近日內地各投資論壇、微信瘋傳一篇文章就更多八卦，話「某女，農村寒門出身，到城市某工廠打工。轉做老闆的正室後成立新公司，挖了原工廠絕大數中高層及客戶，然後離婚。如今可能成為新的中國女首富。」咁多八卦消息，加上蘋果概念，難怪藍思科技成為最矚目新股。
李可強