台灣觀光局趁台北國際牛肉麵節十周年，下月四日至六日喺荷里活廣場舉行台灣牛肉麵節十載美味情，搵咗八家金牌店炮製冠軍牛肉麵，其中三位仲係喺眾多男廚中獲獎嘅女主廚，即場巧手弄炊既溫柔細膩又充滿感情嘅人妻牛肉麵。入場捐廿蚊就有得食。
北平田園餡餅粥主廚王靜儀，以一碗清燉牛肉麵贏得二○一二年台北國際牛肉麵節清燉組亞軍，仲贏得丈夫嘅肯定。靜儀話老公出身麵食世家，食老公親手煮嘅牛肉麵食出真感情，佢入門後跟老公學藝，以清燉牛肉麵贏得亞軍，K.O.老公，「女廚煮牛肉麵勝在細膩、溫柔，讓人家吃出充滿感情的牛肉麵」。
嫁到台灣嘅雲南姑娘、麻辣天堂牛肉麵店老闆娘兼主廚章雪蘭坦言台灣飲食唔啱佢口味，每日都食唔飽，所以佢加辣，「終有餐飽飯吃」，並開設麻辣牛肉麵。佢舊年參加牛肉麵比賽，返唔到屋企過年，喊緊嘅時候諗起細個病咗，媽媽喺中藥加入桂花等佢易啲入口，就創作出以桂花入饌嘅金牌桂花牛肉麵，獲得國際組金牌，老公都話正。
半畝田北方麵食館主廚張美珍，舊年同細路去日本旅行，餐湯有箒喱，細路好鍾意，佢就以醬汁果凍創出充滿溫情嘅惜福牛肉麵，喺舊年獲創意組冠軍。