科網公司鍾意落戶香港，方便發展中港台業務，繼Yahoo、微軟、facebook同Google，Twitter噚日都宣佈進駐香港，喺中環華人行開辦公室，不過今次就有少少雷聲大雨點小，皆因Twitter新興市場銷售總監Peter Greenberger講明，香港嘅人手數目超少，暫時只得廣告部員工，將來亦未必大量增聘人手。
Peter透露，進駐香港係想發展中港台市場，佢知道內地對傳媒監控非常嚴厲，所以今次只係將公司當作廣告公司咁做，畀個平台幫中國品牌提升國際知名度，唔係經營社交媒體。
被問到對「中國Twitter」新浪微博嘅睇法，Peter就笑笑口話唔方便評論，佢哋初來報到，只會專注做好自己嘅業務，其他人與事就唔理咁多。