新世界發展（017）第三代接班人鄭志剛（Adrian）一向熱心推動藝術發展，最近佢與好友兼藝術收藏家周大為合作，為上海當代藝術家徐震喺中環元創方舉行畫展，噚晚開幕禮上，Adrian滿場飛向嘉賓介紹現場作品，逗留超過兩粒鐘，認真落力。
今次展覽由噚日至下周三，現場共有七幅顏色鮮艷、名為《天下》系列嘅布面油畫，其中三幅特大作品，高1.8米、闊1.3米，比人還要高。七彩布畫上面充滿立體感，似係鋪滿蛋糕忌廉，Adrian覺得佢哋好似喺中東國家見到嘅波斯屋頂，尖尖哋。佢就係鍾意徐震呢類充滿官感刺激嘅作品。
Adrian指，藝術可以令志趣相投嘅人聚埋一齊，激發大家唔同嘅想法。佢好樂意推動藝術，除咗內地藝術家，最近又跟本地藝術家林東鵬合作。
既然咁鍾意藝術，佢有冇自己創作番一兩件作品呢?Adrian就好謙虛咁話，都係留番畀其他人創作，佢寧願專心做搞手。
